Fasnacht 2010 Dr Startschuss: a. Faasnachtssitzig 2010, am 29. Septämber 2009 by "Unser Bier" z Baasel. D Vorberaitigen und d Organisazioon lauffe biraits uff Hoochduure. S goht aigetlig nummen noo umme baar Detailer, wo dr verglainereddi Fimferroot no muess byyglen und yyfäädle. Speziell bim Gugge 46er-Ball, im 3 Wagges, wirds ainigi Optimierige gää (Applaus!). Mit Stolz kaa dr Obmaa verkinde, dass d Zahl vo den Aggdiiven um fascht + 20% zuegnoo hett (noonemool Applaus). S Sujet isch klaar, s Goschdym au, d Schaarsche wärde verdailt (also zuegwyyse) und als Voordraab hämmer definitiiv d "Harlekinos" uss Rapperswil/Jona ... ... wo au am 11. Deeschöönee en Uffdritt wärde haa. E Trainingslaager vo unsere drey Pauggischte, mit de Harlekino's, isch am Samschtig, 28.11.09, in Amden, in de Hoochalbbe, voorgseh und terminiert ... b. dr Laarvenaamoolevent vom Sunntig, 10. Januaar 2010: Iber 50 Lyt, im Alter vo knapp 6 Monet und 83 Joor, hänn s Atelier vom Ami-Pierre in Beschlaag gnoo und dr Inhaaber fascht an Rand vo dr Verzwyyflig brocht. E saggstarggen Aaloss mit groossem Soziaalcharaggder ... ... und au s Requisit hett langsaam, aber ganz sicher, Formen und vorallem Faarb aagnoo. c. 1. Marschiebig Fascht 50 PersoonInne sinn an die 1. Marschiebig no Oberwiil, in Ochse koo. Dr Obmaa hett vyyli Detailer vo dr Faasnacht bekannt gää und dr revoluzionääri Göller/Poncho isch demonschtriert worde; wie au die roosaaroote Gamasche. E neijs Goschdym, womme kaa zahlen und glyych groossen Yydrugg macht. Au s Muschter vo de Fähne isch zaigt, die 10 Faahnedrääger und dr Herr Oberstandartenführer sinn bestimmt worde – nit gwählt!!! Wie sich's annere 1. Marschiebig vo dr Gugge 46 au gheert, simmer nadyyrlig kai Meeter gloffe, hänn drfiir aber bedytend mee drungge ... d. Sunntig, 21. Hornig – e Triologie! d.1 Waagedauffi vo dr Güete Bonjour-Clique Uffem Grien 80-Areaal hämmer, zämme mit dr GBC und den Aagfrässene, d Waagedauffi vo dr GBC duurezooge. Absolut phantastisch und yydruggsvoll – schätzigswyys sinn an die 146 Lyt aawääsend gsi. d.2. Fahneweih Dr Pfarrer vo Hääsige hett (...e saumäässige ...) sich Zyt gnoo, unseri 10 Fähne wyrdevoll z Säägne und z Weihe. Merci Chris! Glyychzyttig isch au s neiji Ladäärnli, wo dr Peter Affolter moolt hett (wäär denn suscht?), voorgstellt worde. Laider hett dää dyyri Weihrauch aifach nit welle rauche. Daas miemer denn firs 2011 no iebe ... S Ganzi hett im Rest. Seegarte, in dr Grien 80, stattgfunden und isch, au Dangg em Selfservice, perfäggt gsi. d.3. Zwaiti Marschiebig Es isch nimm anderscht gange – mer hänn au no uuse miesse, will d Formazioon an dr F'10 sooo kompliziert syygi: 10 Fähne, 1 Requist, 1 Ladäärnli, d harlekino's mit 16 SpiilerInne und no ca. 41 Gugge-Stryzzi mit Rhythmussinschdrumänt. E Fimferkolonne wo ca. 76 Meeter lang worden isch – e Riisezuug! Mer sinn sogaar marschiert – genau 4.46 Meeter wyt ... Aber s Ganzi hett drfiir duurt und duurt und duurt ... e. Morgestraich Zem 2. Mool hett e Schyssdräggzyygli vo dr Gugge dr Morgestraich bestritte. Alli in Nachthemmli, Larve mit Kopfladäärnli, mit em neije Ladäärnli, illuminiert vom Benito. Unterem Motto: d Gugge 46 schlooft no – soozuesaage (ca.) 15 Schloofkabbe im Yysatz ... f. 11. Deeschöönee dansant Scho dr Yy- und Uffmarsch vo de 10 Fähne isch beyydruggend gsi ... e noochhaltigi Präss: Waas no nie doo gsii isch, isch yydroffe! Jee ai 4-farbigi Syten in dr BaZ und im Baslerstab, numme iber s Deeschöönee dansant. S hett alli fascht uss de Sogge gjaggt ... g. s Gugge-Blääch S soll noonemool erwähnt sii: d Gugge 46 hett syt 1947 en aigeni Blagedde. Daas isch also kai Erfindig vo dr VauKaaBee oder em Gläbberdäschli! Genau soo, wie d Platzkonzäärt, anno 47, vo de 46er erfunde worden sinn (s.h. auch: Schweizer Volkskunde, Heft 6, 75. Jahrgang, Basel 1985). Eb si schlussändlig denn wirgglig esoo ussgseht, isch no offen und fir alli immer wiider en Yberraschig ... Dem Äffli sei Dank! d Voorberaitige fir unsere Cortège Wie allewyyl: chaotisch, hooch 4! S git Lyt, die kemme äxtraa vor s Casino, um dää Sauhuffen und daas Speggdaggel könne z bewunderen und z gniesse. Fir dr Route-, dr Zuugs und dr Fäänechef ischs zem Drvoolauffe gsi. Also ebbe, wie immer ... h. Gugge 46er Ball im Trois Rois, auch «Drey Waggis» genannt Sälbschtvernadyyrlig isch dää Groossaaloss, syt Joorzähnte, feschte Bestanddail vo dr Gugge 46 und gheert aimool mee zue de drey Heehepünggt vom Faasnachts-Zyschtig 2010; näbscht-em Deeschöönee dansant im Casino und em Striggede-Ball in dr Saffre. Szeene-Kenner saage sogaar, s syyge die 3 beschte Aalösser vo dr ganze Voor- und Faasnacht – iberhaupt! Daas saagen aber numme d Szeenekenner und nit alli die, wo d Faasnacht erfunde hänn ... dr aasträngend Cortège und d Päuseli Will mer jo schon e weeneli bedaggd sinn, miemer noone baar hundert aggdiive Meeter, jeewyyls e (verdienti) Pause mache. Soo im Laiezorn, im Schlüssel und in dr Saffre, bevoor mer denne ins 3 Wagges yymarschiere ... ... wo scho alles fir unsere Grooss-Event vorberaitet worden isch. i. dr Gugge 46er-Ball im 3 Wagges (Trois Rois) Noonem ca. 4. Apéro hetts denn halt au noone 5. gää ... Aber nit alli hänn d Rueh kenne gniesse: Verschiideni hänn au miesse flychten und sich erhoole. Es isch aber e Bombe-Stimmig im 3 King gsi – e Fullhouse bis zem Abwingge! k. dr kreenend Abschluss vo de Harlekino's Unsere FrindInne uss Rapperswiil/Jona hänn die Aagfrässene ermeegligt, in ihrem Clique-Käller en Abschiidskonzäärt z gää. S hett gfäggt, wie lätz und si hänn fascht nimmen uuse deerfe ... l. dr Bummel 2010 Dää findet am Samschtig. 5. Juni statt. Ca. 30 PersoonInne hänn sich drfiir aagmäldet. Warte mer daas emoolen ab ... m. Special-Event bym Felix Grisard Am 15. Juli (Ersatzdatum, bi Rääge, 22. Juli) laadet dr Felix uff sii Wunderterrassen yy. Daas betrifft alli Aggdiiven und Passiive, inkl. PartnerIn u.dgl.m. n. Auguscht 2010 Sitzig vo allne Mandaatsdrääger zem Thema "Gugge 46 - quo vadis?". Und im Spezielle: Fasnacht 2011/2012 und Visioone bis 2046; unserem 100-Jährige ... o. Faasnacht 2011 Die 1. Faasnachts-Sitzig 2011 isch am Zyschtig, 5. Oktoober 2010, ca. 18.46 h, im Binniger Dorf- und Fasnachtsmuseeum! Georges, Obmaa vo dr (Wunder)Gugge 46 Flyer: "11. Déjeuner dansant" Menü Deeschönee Blagedde 2010 Fahne