top of page

 

 

D Muulwiirf - S Liedli vom 7. Februar

 

I bi ne guete Schwyzer, bi zwar gschiide scho 4 Joor

Und zahl e Huffe Unterhalt, drum kunnt s mer länger vor,

i bi nid gschiid, doch flissig, und sehr gärn inkognito,

I ha mi aigni Mainig und erklär euch jetz wieso:

 

Hüt Morge uff em Voltaplatz, i stand im Stau, hejo

Do het mer sone Peugeot-Waggis prompt dr Vortritt gno

Zäh Meter wyter vorne het, i ha s no fascht gseh kho

Sich ain uss Lörrach yynedruggt, am Sunntig stimm i jo...

 

Und wäg so Lüt kumm ich jetzt au no zschpoot im Büro aa

Dr Chef, halt typisch Schwoob schyynt für das kai Verständnis z ha.

Drum het är au si Zämmeschiss uff hochdütsch uusegloo

Und das die Wuche s fünfte Mol, am Sunntig stimm i Jo.

 

Denn bin i uff e Claraplatz und dängg für mi: Oh jeh

An jedem Ecke hani dört e Frau mit Burka gseh

Do waisch nie, was die drunter hän, sie häns nie uusegno

Im Grund gno isch s mer schyssegal, am Sunntig stimm i Jo.....

 

Am elfi vorem Bässlerguet, stöhn die dört mit Asyl

Wenn s Auti dört mol schtoh losch, denn nur mit me schlächte Gfühl,

wär waiss denn ob s no do isch, denn für das sin die jo kho,

denn styyge wieder d Prämie, am Sunntig stimm i jo..

 

Zem Zmittag hani nid vyyl Gäld, denn ich verdien jo nüt

Dr Boss syg schyyns en Expat und gits lieber sine Lüt

drum gits woorschiins e Döner, denn gnue Läde sin jo do,

statt Kalbsbrotwurscht mit Röschti, ouäh, am Sunntig stimm i Jo!

 

S Trudi ussem Turnverein, die gfallt mer jo scho lang,

Frogt mi zu miner Mainig und ob ich an d Urne gang.

Drum sag i taktisch: los, es intressiert mi nid eso!

Bi Fraue weisch jo nie so rächt, am Sunntig stimmi jo.

 

I wott mi wyterbilde und schalt drum dr Färnseh yy

und gseh, in Afrika do gits no kai Demokratie

Die söllen uns als Vorbild näh, und über d Biecher go

Für das mien die dehaime syy, am Sunntig stimm i Jo!

 

D Svetlana uss em Cabaret, die liebt mi allem aa,

i han re d Handyrächnig zahlt, drum lütet sie gly aa,

well kämt sie uss Brasilie, hätt sie mi nur ussgno

mit mir machsch das nur aimol und am Sunntig stimm i Jo...

 

Am Samschtig isch e Fuessballmatch, do gib i aim uffs Muul,

denn gegenerischi Fans und dütschi Fuessballer sin schwul,

das isch doch für dr Sport nid guet, me sott das unterloo

I bi zwar tolerant, aber am Sunntig stimm i Jo.

 

I spiil verruggt gärn Lotto, aber gwunne han i nie,

drum wärde die im Färnseh mini Zahle jetzt bald zieh,

denn wandre n ich grad sofort uss, das händ er halt drvo,

Als Usslandschwyzer stimm ich denn vo Thailand uss mit jo!

 

I waiss was uffem Spiil schtoht, doch die EU isch mer glyych,

mer sin do dangg de Bangge immer no verglyychswyys ryych

well s Volk nie das stimmt, was ich will, beschtoht kai Risiko

s wird sowieso nid agnoo, also machts nüt, stimm ich jo!

 

Bi 50, 3 Prozänt hets s Volk halt immer rächt

Worum de stimmsch, das isch egal, sygs Fruscht oder nach Gschlächt

Nur S wurd hälfe wurdsch im Vorfäld öppis vo dr Sach verstoo

Sunnsch sootsch dr Zeedel statt in d Urne d Schyssi aabe loo.

d Fasnacht 2014

D Stroofrichter

bottom of page